Mar 14 | KQC | STEP | Passover ma Beredi Yeast de Feidena di Irakuna bi meda remanu maka niyo mina irakuna regedi di. Ma Sei ma amiye utari naivo vene di warika vene ma ago gira oteimana vene bi ida maina regamadi suiri Iesu moisi umuyegedi di.

a 14.1:Ex 12.1–27

b 14.3:Lk 7.37–38

d 14.7:Deut 15.11

e 14.18:Ps 41.9

f 14.24:Ex 24.8; Jer 31.31–34

g 14.27:Zech 13.7

h 14.28:Mt 28.16

i 14.49:Lk 19.47, 21.37

j 14.58:Jn 2.19

k 14.62:Dan 7.13

l 14.64:Lev 24.16

Mark 14

Iesu umuyegedi di sina

(Mt 26.1–5; Lk 22.1–2; Jn 11.45–53)

1 Passover ma Beredi Yeast de Feidena di Irakuna bi meda remanu maka niyo mina irakuna regedi di. Ma Sei ma amiye utari naivo vene di warika vene ma ago gira oteimana vene bi ida maina regamadi suiri Iesu moisi umuyegedi di. ^a 2 Mina vene yaku niyadi, “Idu mina irakuna fuofuori bi de regifa, adina bi amiye yaku una gubuyo resi ruda regedi baebu.”

Iesu bi Bethany ri diga ini adari moi rausi reyo

(Mt 26.6–13; Jn 12.1–8)

3 Bethany taoniri amegamo ri, Simon kaere sena bi refera amiye di yavari iruku irigamo. Rema yokoi bi siua yokoi ideri diga di sisika buni ini roka nard mina moi baiyo. Diga iniye bi fore toragade dudu voi rededi ma mina siua bi fore roka alabaster dudu riyadi. Mina rema yaku siua ini diga nufa uratokuyo rofu Iesu di adari rausi reyo. ^b 4 Minari amededi vene bedakai bi gubuyo resi iniyeiniye niyadi, “Beika resi mina diga ini sisika buni bi maku tavoi reyo? 5 Mina diga ini sisika buni, bi besa 300 siriva fore ^{▼▼14.5 siriva fore:6.37 baku re.} voi reyagadu resi fore bi gugura nufa de vene maragadu!” Ina vene bi mina rema rofu di gubuyo dudu, ago gira niyadi.

6 Idu Iesu yaku niyo, “Mina rema ferefa! Ya bi beika resi ina rofu toe madedi? Ina bi na rofu vegu buni vayavaya reyo. 7 Gugura nufa de vene bi ya sa toga amegedi resi goina medari yi mokegedi bi mina vene aedegedi. Idu na bi toga ya sa de amegida. ^d 8 Ina beika rego bi reyo mini; ina yaku diga nai rovaitari rausi reyo bi dobau na guri aigedi dada na dogo reyo. 9 Rama iniye ya nida, kono tora noibanuri bi mina ago buni ni rausi regedi, ma ka mina rema yaku ini beika reyo mina oteimagedi, ina ka mokeyagane.”

Judas yo niyo Iesu tautore regi

(Mt 26.14–16; Lk 22.3–6)

10 Kamini Judas Iscariot, kaere bi Iesu di usi dina amiye tuero yokoi yaku bi Sei ma amiye utari naivo vene di warika vene rofu boyo Iesu ina vene rofu tautore regi. 11 Mina neideyadi ri, bi ada toragade resi Judas rofu ni tore reyadi fore magedi vo niyadi. Ye Judas bi ida maina reyo, gokai ida dudu Iesu ina vene di vanari aigo.

Iesu yaku Passover di iruku ini usi dina vene sa iriyadi

(Mt 26.17–25; Lk 22.7–14,21–23; Jn 13.21–30)

12 Ouresi medari, Beredi Yeast de Feidena di Irakunari, Passover di mamoe di mida ori sisika reyadi ri, Iesu ini usi dina vene yaku ni kaiteyadi, “Goinari ya yaku yi ura reisa sanari bogifa rofu yi iruku irina sana dogo regifa ma yi Passover di iruku irigiya?”

13 Ye Iesu yaku ini usi dina vene remanu ni feidesi niyo, “Taoniri bosi mironari amiye nokoi koru urena adodisi ya baku rego. Ina usi bofo 14 ma ina yaku yavari dui rego. Mina yava amiye ni oteimafo, ‘Oteimana amiye yaku niyo, Goina daiyutu bi ya ma nai usi dina vene sa Passover di iruku irigifa?’ 15 Mina yava amiye yaku odorori daiyutu tora ya oteimago. Mina bi sena veuka reyadi. Mironari uni iruku dogo refo.”

16 Ini usi dina amiye remanu bi mina sana feresi taoniri dui resi beika sina Iesu yaku ni oteimaro mina veitao reyadi. Ye ina vene bi minari Passover di iruku dogo reyadi.

17 Kamini uriyenau niyo ri, Iesu bi mina amiye tuero sa okiyadi. 18 Amesi iruku irigamadi ri, Iesu yaku niyo, “Na bi rama iniye ya nida, ya nokoi yaku na tautore rego — kaere na sa iriiri redo.” ^e

19 Ina vene bi uka esika resi iniye yokoiyokoi Iesu rofu niyadi, “Rama na bi ide ba?”

20 Iesu yaku ni kabai reyo, “Mina bi ya yi fogori tuero nokoi, kaere bi ini beredi siua ideri na sa moido. 21 Amiye di Mida bi muyego ina dada nisi bura reyadi kana. Idu mina amiye bi iriyeduka, kaere bi Amiye di Mida tautore reyo! Ina ini buni bi, ina bi vata de niyagadu!”

Warika Amiye di iriiri

(Mt 26.26–30; Lk 22.14–20; 1 Cor 11.23–25)

22 Ina vene bi iruku irigamadi ri, Iesu bi beredi moisi buni toragade masi uroki resi ini usi dina vene magasa niyo, “Moifo, mina bi nai rovaita.”

23 Kamini biyo moisi buni toragade masi ina vene rofu maro ma gaga reyadi. 24 Resi ina vene rofu niyo, “Mina bi nai dava uka ago rido. Mina bi amiye taugade rofu bogo. ^f 25 Na bi rama iniye ya nida, na mina waini di meko bi dubusa de irigida mirona medari mamo, kaito Sei di ourefeidena amena sanari mo waini ruaka irigida.”

26 Kamini yauta nisi yakusi Olive yabo di ikari boyadi.

Iesu yaku Peter ina rofu ni sui rena ogau niyo

(Mt 26.31–35; Lk 22.31–34; Jn 13.36–38)

27 Kamini Iesu yaku ina vene ni oteimaro, “Ya vene bi raga disi na feregedi, mina bi sena ini bura riyadi, ‘Mamoe nari redo amiye umuyegida ri, mamoe iniye bi rerevaida nigedi.’ ^g 28 Idu gabi dadi rae regida ri, na siko Galilee ri ourei bogida.” ^h

29 Idu Peter yaku niyo, “Mina tau bi ya feregedi, idu na bi de!”

30 Iesu yaku ni kabai reyo, “Na bi rama iniye ya nida, gua urusari, kokoro yaku uru remanu raka nina koderi, ya ya kaya bi uru regode na rofu ni sui regiya.”

31 Peter ago ni gira resi niyo, “Na kaya ya sa muyegida vo nisi, ya kaya ni sui de regida.”

Ini asiyaka vene ka Peter yaku niyo kana dudu maka niyadi.

Iesu Gethsemane ri usausa niyo

(Mt 26.36–46; Lk 22.39–46)

32 Ina vene bi gagani roka Gethsemane ri boyadi, ma Iesu yaku ini usi dina vene rofu niyo, “Ruika minari amegedi ma na bi usausa nigida.” 33 Ina sa bi Peter, James ma John afesi kamini ini uka bi esika tora reyo. 34 Ina yaku ini amiye regode ni oteimaro, “Nai muyena ida ne rei veyaka adina nai vima bi esikaesika redo. Minari amesi nemoko kikifo.”

35 Ne itua nana rei bosi konori keto resi usausa niyo ye buni mirona meda nemoko ina rofu bi orefaraine. 36 Iesu yaku niyo, “Madini Baba, vegu toragade ya rofu bi aita maka. Mina esikaesika di biyo bi na rofu moi. Nai mokena dudu bi de, idu yi mokena dudu maka regiya.”

37 Kamini ina bi ini usi dina vene rofu dairisi veitao reyo ma ina vene bi varegamadi. Peter rofu niyo, “Simon, ya bi vareisa ba? Ya bi meda nemoko nokoi maka bi nemoko kiki de regiya ba?” 38 Ye ina rofu niyo, “Nemoko kikigasa usausa ni kumo mokena no yaku ga ya uketo reyaine. Vima bi yaku redo idu rovaita bi afi reyo.”

39 Dubusa disi mina ago dubusa usausa niyo. 40 Kamini dairi okisi bi dubusa varegamadi veitao reyo, adina varei muyeyadi. Ina vene bi diba de ina rofu bi beika nigedi.

41 Uru regodenu dubusa dairisi ina vene rofu niyo, “Ya vene bi besa sifere regasa varededi ba? Kaini! Meda bi okiyo. Vefo, Amiye di Mida bi tautore resi vegu no rena vene di vanari aiyadi. 42 Dadifo! Una bi dinadi! Ve nai tautore rena amiye bi baido mini!”

Iesu moi gira reyadi

(Mt 26.47–56; Lk 22.47–53; Jn 18.3–12)

43 Iesu bi sina nigamo ri, Judas, kaere bi amiye tuerori yokoi, bi ogau niyo. Amiye toragade ina sa bosi ini vanari bi bainasi ma gai moi vau reyadi, kaere bi Sei ma amiye utari naivo vene di warika vene ma ago gira oteimana vene ma tora vene ni feideyadi. 44 Kamini Judas gokai rego di ida bi sena ari fereyo mina amiye tau sa niyo, “Kaere fuka regida amiye bi rama mini, moisi afei digedi yi nari gira regedi gabireri.”

45 Judas okiyo ri bi Iesu urana bosi niyo, “Oteimana amiye,” resi fuka reyo. 46 Ye vanau moisi moi gira reyadi. 47 Kamini ina atafuri are rega amedo amiye yaku bainasi moisi Sei ma amiye utari naivo amiye tora di ini naivo redo amiye di anema nugai feideyo. 48 Iesu yaku ina vene rofu niyo, “Na bi duma rena amiye, resi ya vene bi bainasi ma gai dudu desi na afegi baiyadi ba? 49 Ari taugade na bi ya vene sa, Sei ni vakena yava ideri amiye oteimaga maka, resi ya vene bi na moina de reyadi. Idu Sei di ago di bura reyadi mina moi rama aiyainedi.” ⁱ

50 Ye ini usi dina vene bi ori disi ina rofu fereyadi.

51 Mida godua nokoi bi varuka keika iru maka risi Iesu usi bogamo. Kamini mina amiye moigika reyadi, 52 idu ini varuka keika fereyo rofu fai sara raga reyo.

Iesu kanisoro di nemokori are reyo

(Mt 26.57–68; Lk 22.54–55,63–71; Jn 18.13–14,19–24)

53 Iesu bi afei boyadi Sei ma amiye utari naivo amiye tora rofu resi Sei ma amiye utari naivo vene di warika vene, tora vene ma ago gira oteimana vene tau bi egogo reyadi ina adinari. 54 Peter bi gaima nisi Iesu usi boyo. Resi mina Sei ma amiye utari naivo amiye tora di yava ida nefauri dui riyo. Mironari yava nari vene sa ameinu resi ita imigamo. 55 Sei ma amiye utari naivo vene di warika vene ma kanisoro vene tau bi ago di adina maina regamadi gokai dudu Iesu umuyegedi, idu ina vene bi ago di adina be de baku reyadi. 56 Amiye taugade bi ofaofa dudu Iesu ni kake rigamadi, idu ini sina bi de rama aiyo.

57 Amiye bedakai bi are resi sina ofa ina rofu nigamadi resi niyadi, 58 “Una neideyafa ini beika niyo, ‘Amiye vana yaku akuyadi Sei ni vakena yava bi ukerova rigida meda regodenuri bi ma nokoi akugida, amiye yaku akuna de mina akugida.’” ^j 59 Mina sina niyadi mina ka rama aina de reyo.

60 Resi mina Sei ma amiye utari naivo amiye tora yaku dadisi ina vene di nemokori Iesu ni kaiteyo, “Ya bi ni kabai de regiya ba? Mina ago ya rofu ni kake rededi bi beika be nigiya?”

61 Idu Iesu bi bere nisi ago nokoi de ni kabai reyo. Dubusa Sei ma amiye utari naivo amiye tora yaku ni kaiteyo, “Ya bi Keriso kaere bi Sei buni iniye di Mida ba?”

62 Iesu yaku niyo, “Mina bi na; resi Amiye di Mida bi Vava Iniye di vana rama rofu ameibigo resi seuya omari baibigo ma vegedi.” ^k

63 Kamini Sei ma amiye utari naivo amiye tora bi iniye di ini varuka uesi resi ni kaiteyo, “Beika resi nisi una bi mina ago di adina besa ni maina resifa? 64 Sei di roka moi no rigika ago bi neideyadi mini. Ye ya yaku mokededi bi gokai?” ^l

Ina taugade yaku niyadi muyego bi buni.

65 Resi bedakai bi ina rofu ayaka su resi ini nemoko bi fafa risi vana kumu risi ugasa niyadi, “Gabi rofu di vata nigo ago ni!” Resi yava fore nari rededi vene yaku moisi bi ini ragena fafa riyadi.

Peter yaku Iesu ni sui reyo

(Mt 26.69–75; Lk 22.56–62; Jn 18.15–18,25–27)

66 Mina ituari Peter bi yava ida nefauri amegamo ri Sei ma amiye utari naivo amiye tora di naivonaivo rema mida yokoi baiyo. 67 Ina yaku Peter veyo bi ita imiga amegamo resi nesi niyo, “Ya ka Iesu Nazareth amiye sa.”

68 Idu ina yaku ni sui reyo, “Na na diba de ya beika nisa bi nai adari ufatena de redo,” nisi ida vena etofarori yakuyo. Kamini mina ituari maka kokoro raka niyo. ^{▼▼14.68Bura bedakai biKamini mina ituari kokoro raka niyonufa de.}

69 Kamini mina naivonaivo rema mida yaku Peter dubusa veyo amiye sa are regamadi resi niyo, “Mina amiye ka nokoi mini.” 70 Idu Peter dubusa ni sui reyo.

Gabi ituari are regamadi vene yaku Peter rofu niyadi, “Rama iniye ya ka nokoi mini, adina bi ya ka Galilee amiye.”

71 Kamini iniye fafau ni karaini resi iniye ni warika resi niyo, “Mina amiye ya vene yaku ni dodi rededi bi na na diba de!”

72 Mina fuofuori kokoro dubusa raka niyo. Kamini Peter bi beika Iesu yaku niyo ago mina mokeyo, “Kokoro uru remanu raka nina koderi ya bi uru regode na rofu di ni sui regiya.” Mina mokena yaku uyo ma isaka niyo.